لوشن كريم ٢١ للجسم | Body Lotion Creme 21

السلام عليكم و رحمة الله و بركاته 🌻 

مرحباً فيكم بموضوع جديد من مدونة تجرُبه تايم 🙋🏻

المنتج الي راح اقوم بتقييمه اليوم هوا لوشن جسم من شركة كريم ٢١ ، طيب هذا اللوشن اشتريته من فتره من بنده، طيب خلني اقولكم ليش انا اتحمست و اشتريته، السبب الرئيسي الي خلاني اشتري لوشن ٢١ هو المدح الزاااايد على كريم ٢١ ، فقلت خليني اجربه، و معظم المدح كان عشان قوة ترطيبه و انه مناسب للبشره الحساسه. 

من فتره شوفت وحده بالانستقرام تشرح طريقة الحمام المغربي 😀، و ذكرت انها نهاية الحمام ترطب جسمها بهذا اللوشن لوشن كريم ٢١ ، و قالت انه يناسب البشره الحساسه و المتهيجه، من هنا انا خلاص قلت النزله الجايه للصيدليه او بنده لااازم اشتري هذا الكريم ، و بالفعل اشتريته 💸 و له عندي تقريبا شهر

، ماني قادره اخلصه.

المهم بالنسبه ليا و راح اقولكم هيا بصرحه هذا اللوشن مررره ما عجبني🙅🏻 ، و ذلك لعدة اسباب، اولها و اهمها انه بعد تقريباً ثلاث ساعات احس انه الترطيب اختفى ، يعني لما امسك بشرتي ما احسها متغديه ، و للاسف هذا اللوشن الوحيد الي لما استخدمه الاحظ جفاف شديد ببشرة جسمي 🚶🏻، مع انه ما اعتبر بشرتي جافه جداً، احسها قريبه للبشره العاديه اكثر من البشره الجافه، لكن مع استخدامي لهذا اللوشن احس انه بشرة جسمي قلبت جافه 🌚😑، اول مره تسير معايا هذي الحاله.

شي ثاني ما عجبني بلوشن الكريم ٢١ انه ريحته جداً قويه ✋🏽، الريحه موش بطاله ابدً، احسها ريحة نظافه، لكن افضل انه اي شي الي استخدمه سواء على بشرة وجهي او جسمي يكون بدون عطور. 

وبس ، وطبعاً كريم ٢١ فيه منه انواع مختلفه تناسب جميع انواع البشرات، الي انا اشتريته و قمت بتقييمه هو النوع الي مخصص للبشره العاديه، شي ثاني حابه اذكرو انه لوشن كريم ٢١ متوفر بسعر مناسب في الصيدليات و السوبرماكتات، لكن بالنسبه ليا ما راح ارجع اشتريه مره ثانيه، و ان شاء الله اقدر اخلص هذي العلبه 😅 ، بس عشاني ما احب ارمي شي بالزباله 🙄

في نهاية البوست اتمنى انكم استفدتوا من هذا التقييم لمنتج كريم ٢١ 🤗