ماسكارا سموكي لاش من ميك اب فورايفر للاستخدام اليومي | makeup for ever smoky lash

أهلاً و سهلاً فيكم في بوست جديد من مدونة تجرُبه تايم . 🙋🏻🤗 

الماسكارا و ما ادراك ما الماسكارا 🤓 ، الشي الي من جد يحلي مكياج العين بعد الكحل هيا الماسكارا 👁، بوست اليوم حيكون عن ماسكارا من زمان عندي خلصتها الى آخر قطره ✋🏽 ، وهذا شي مو غريب لاني ما احب اشتري ماسكارا الا لما تخلص الي عندي، لانه معروف الماسكارا من الاشياء الي لازم تستخدميها على طول عشان ما تنشف، يعني ما ينفع تفتحي وحده و تستخدميها شويا بعدين تركنيها على جنب و تفتحي وحده تانيه لانه مع الوقت حتتغير و تنشف بسرعه . 

المهم الماسكارا الي حتكلم عنها بهذا البوست هيا سموكي لاش ( smoky lash) من ميك اب فور ايفر ( makeup for ever) اشتريتها من سيفورا الي بالريدسي مول بجده، سعرها كان مناسب يعني مو مره غاليه زي الماسكارا من لانكوم و دي الطقه 🤑. 

الماسكارا حسيت انها حلوه للاستخدام اليومي 🙇🏻، مكتوب انها تكثف وتطول و تقوّس الرموش ، من استخدامي لها لاحظت انو صح تطول و تكثف و تقوس بس بشكل بسيط ✋🏽عشان كذا قلت انها تنفع للاستخدام اليومي. 

فرشة الماسكرا تقليديه يعني مو من الي تجي زي المطاط، لا فرشاة هذي المسكارا شعرها عادي، و حسيت انه كمية كبيره من المنتج تتجمع على طرف الفرشاه 😓، يعني لازم انظف طرفها قبل ما استخدمها او كارثه حتسير . 

من الاشياء الي ما حبيتها بهذي الماسكار انه عيني تتحسس شويا منها، عيني تقلب حمرا اول كم دقيقه 😔 ، بس الاحمرار يروح مع الوقت، شي ثاني ما عجبني بهذي الماسكارا انها ما تنفع للاستخدام الطويل، او بالجو الحار، الي سار معايا انه لاحظت كتل صغيره من الماسكارا ساحت تحت عيني 🙃. يعني بالعربي لا تفكري تحطيها اذا كنتي رايحه لحفله او مكان عارفه انك حتعرقي فيه زي الجيم مثلاً. 

🗣الخلاصة: 

🌸 ماسكارا حلوه للاستخدام اليومي. 

🌸 مظهرها طبيعي. 

🌸 سعرها مناسب تقريبا. 

🌸 متوفره بالاسواق السعوديه.

🌸 ما تنفع للاستخدام الطويل ، يعني ٦ ساعات بالكثير و بعدها حتبدا تسيح. 

🌸 ممكن تحسس العين ، ما انصح فيها للعين الحساسه .

و بس اتمنى تكونو استفدتو 🤗💕