الحل لمعالجة حبوب بعد الحلاوه او الشمع

 

صباح / او مساء الخير 

زي ما انتو شايفين من العنوان اليوم البوست راح يكون عن الحبوب الي تطلع من بعد الحف بالشمع او الحلاوه او الفتله 😣. و اتوقع انو كثير من السيدات و الفتيات يعانو من هذي المشكله، و للاسف انا وحده منهم 😔، بالنسبه لوضعي بعد ما اشيل الشعر بالحلاوه او الشمع تطلعلي حبوب صغيره في بعض الاماكن ، في البداية تكون المنطقه حمرا مره و بعدين تدريجيا يخف الحمار و تطلع حبوب كثيره تغطي المنطقه، عانيت منها كثير ، المناطق الي تحصلها هذي الحاله بالنسبه ليا هي الوجه و اليدين من فوق و الظهر. 

بحثت كثير عشان الاقي حل لهذي المشكله 🕵، و الحل كان الليزر ، تحمست وروحت لعيادة معروفه ، بس الاخصائيه قالتلي ما ينفع الليزر لانو الشعر وبري 😑، المهم بدأت جلسات الليزر بس طبعاً مو لهذي الاماكن، و كنت اشوف الممرضه بعد ما تخلص من الليزر تدهن طبقه ثقيله من المرهم الي بالصوره ، و تركز على الاماكن الحمرا، و قالت ضروووري تستخدمي هذا المرهم لمدة ٤ ايام من بعد الجلسة و تبتعدي عن التقشير و المويا الحاره و الحمام المغربي. 🚶🏻

 

المهم استمريت على نصايحها ، و بعد فترة جات مناسبه مهمه 💃🏻 و كان ضروري اني انظف ظهري من الشعر ( طبعاً بالشمع او الحلاوه) ، و قلت يلا اتوكل على الله و خليني اجرب نفس الخطوات الي اسويها بعد الليزر، و هي زي ما قلت قبل اني فوراً بعد شيل الشعر ادهن من مرهم فيوسيباكت ب  ٤ مرات باليوم لمدة ٤ ايام ( متوفر بكل الصيدليات و بسعر ما يتجاوز ٢٠ ريال سعودي ) و كمان اتجنب التقشير و الحمامات الساخنه. 

النتيجه كانت جدا حلوه 😻 ، ما اقولكم انو الحبوب مره و حده ما طلعت ، بس فرق كبير عن المرات الي ما استخدمت فيها هذا المرهم، و اخيراً انصح اي وحده تعاني من حبوب بعد شيل الشعر و الي عادة تترك آثار فضيعه وراها، انصحها انها تجرب هذي الطريقة و ان شاء الله تلاحظو فرق حلو. 

🗣الخلاصة:

🙅🏻 لتجنب حبوب ما بعد شيل شعر الجسم او الوجه بالحلاوه او الشمع او الفتله انصحك بالتالي: 

🌸 وضع طبقه ثقيله من مرهم فيوسيباكت ب فوراً بعد عملية نزع الشعر. 

🌸 المداومه على وضع المرهم ٤ مرات باليوم لمده لا تقل عن ٤ ايام. 

🌸 تجني التقشير و الماء الحار و الحمام المغربي لمدة اسبوع على الاقل.