زيت جوز الهند لتنعيم الشعر 🤔

في هذا البوست راح اكتب عن تجربتي الشخصية لزيت جوز الهند 🌴لتنعيم الشعر🙆🏻.  

في البدايه انا وحده شعري طبيعته ناعم و فيه لمعه يعني بالعربي دهني، بس طبعا مع الصبغات و سحب اللون انعدم ابو جده 🏃🏻. و اكيد تعرفو سحب اللون كيف يعدم الشعر. و للأسف شعري دحين صار زي سلكة المواعين و اسوء كمان خشن و ضعيف بنفس الوقت و اطرافه معدوومه و تتكسر بسهوله 🤕. المهم اني جربت اشياء معالجه للشعر كثير على امل انو يرجع زي قبل او على اقل يصير صحي شوي 😪. جربت حمامات زيت و ماسكات و زيوت كلها متعبه و مكلفه 💸و نتيجتها مو ذاك الشي☹️. الا شي واحد قلب شعري فوق تحت و طبعا للافضل 😀 و دا الشي هوا زيت جوز الهند🌴🙌🏽 انا جربت المتوفر الي هو من شركة باراشوت  تلاقوه بالصيدليات و السوبرماركت و العطارين يعني متوفر بكل مكان تقريبا و سعره جداً مناسب 🤗، يعني اشوف انو ما تحتاجي تطلبي زيت جوز هند من التاجرات او النت خلي الطلب للاشياء النادر تلاقيها في اسواقنا😍 ( رأيي الشخصي)
، طبعا لو اجلس امدح في هذا الزيت ( زيت جوز الهند ) من اليوم لبكره مو كفايه🙆🏻. والله يا بنات ما ابالغ لما اقول انو شعري رجع تقريبا زي قبل الصبغ و البهدله، يعني شعري صار مصبوغ بلون حلو و مظهرو صحي 👸🏻بعد استخدامي لهذا الزيت، و النتيجه لاحظتها من اول استخدام ، طبعا في اكثر من نوع لزيت جوز الهند من باراشوت بس انا جربت نوعين الي هما باراشوت جوز هند نقي ١٠٠٪‏ و الثاني الي جربته باراشوت شاملة سر جمال الشعر الهندي.  

كلهم حلوين بس الاول الي هو النقي ١٠٠٪‏ قوامه اثقل و نفع معايا اكثر .طريقة استخدامي لزيت جوز الهند مره سهله بس امشط شعري و اغرقه بالزيت قبل كل ترويشه🚿 ( اغسل شعري اربع مرات بالاسبوع ) و اخليه على شعري من نص ساعه لساعتين  🕰اهم شي مو اكثر من ساعتين خصوصا انو شعري دهني و يقولو كثرت الزيت يطيح الشعر😣 ، المهم انا اخليه على شعري من دون كيس او طاقيه لانو جذور شعري خفيفه ما تتحمل زيوت ، و بس اغسل شعري بشامبو و بلسم ترطيبهم عالي و ولا احلى🤗. احياناً احط بديل زيت بعد ما انشف شعري بالمنشفه ، و اخليه ينشف طبيعي بدون ما استخدم سشوار. 

اتمنى تكونو استفدو من هذا البوست 💕💗💕

زيت باراشوت