اهلاً و سهلاً فيكم في بوست جديد من مدونة تجرُبه تايم 🤗، اليوم راح اتكلم عن منتج عناية بالجسم ، هذا المنتج اشهر من نار على علم، مشهور جداً في المنتديات و الانتسقرام، و في اي خلطة للجسم تلاقي من مكوناتها هذا الكريم و خصوصاً الخلطات الي تعالج اختلاف لون الجسم و الجفاف، و طبعاً انا اتحمست اجربه عشان توحيد لون الجسم و الترطيب .
اشتريت كريم الجليسوليد من السوبرماركت ب ١٢ ريال و نص ، أهم شي النص 🤓، الكريم متوفر في الصيدليات و السوبرماركت و العند العطاريين ، في منه احجام انا اخذت الحجم المتوسط ،المهم ح اقولكم طريقة استخدامي و النتايج الي حصلت عليها.
اوك بالنسبه لطريقة استخدامي ، جداً سهله ، بدون خلطات ولا اي شي، كل الي اسويه اني ادهن الكريم كل يوم بعد ما اغسل جسمي، بس ما اقولكم ع الشعور و التلزيق الي احس فيه ، هذا الكريم جداً جداً ثقيل كأني ادهن فازلين مخلوط بسمن 😑، مره الاحساس يقرف ، مستحيل ادهنه و انا بالحمام ، لازم اطلع الغرفه يعني بمكان بارد عشان ينشف بشكل اسرع، استخدمته حوالي ثلاث أسابيع.
النتيجة جداً جداً حلوه ، ترطيب فظييع ، حسيت جلدي سار اليّن و انعم 😍، الترطيب يجلس لساعات طويييله، بخصوص توحيد لون الجسم حسيت بفرق بسيط وهذا الفرق ممكن نتيجة الترطيب ، يعني اذا حاسه انه اختلاف اللون عندك بسبب جفاف البشرة و عدم الترطيب الكافي في هذي الحاله ح انصحك باستخدام هذا الكريم ، بس لازم تصبري على احساس التلزيق و اللسلسه 😖، و شي ثاني حابه انبه عليه انه هذا الكريم فيه عطر فما انصح فيه للاماكن الحساسه. بالنسبه ليا وقفت استخدامه عشان ثقله و سرت استخدمه فقط للركب و الاكواع لما احسها جافه جداً.
🗣 الخلاصة؛
🌸 مرطب رائع للبشره الجافه و الشديدة الجفاف.
🌸 يساعد في توحيد لون الجسم.
🌸 متوفر بكل مكان.
🌸 سعره مناسب جداً في حدود ١٢ ريال سعودي.
🌸 يدبق و يلصق مره ، يعني البشره ما تمتصه بشكل كامل.
🌸 يحتوي على العطور.
و بس ، اتمنى انكم استفدتوا من هذا البوست 💕💗💕
جربي تستخدميه زي البلسم .. انا بعد مااستحم اجفف جسمي و احط منه
ReplyDeleteو ارجع تحت الدش مره ثانية .. يمكن الطريقة طويلة شوي
بس حتى بعد ماادخل تحت الموية يترك ترطيب خفيف على البشرة و مااحتاج ارطب ثاني